ក្នុងពេល២ឆ្នាំចុងក្រោយនេះ ខ្ញុំមានសំណាងដែលអាចហៅប្រទេសកម្ពុជាថាជាផ្ទះរបស់ខ្ញុំនិងបានតាមដានស្នៀតក្បាច់គុនល្អៗបំផុតមួយចំនួនរបស់ប្រទេសនេះ។
ពេលវេលាដ៏មោទនភាពបំផុតរបស់ខ្ញុំនៅទីនេះគឺនៅពេលអ្នកប្រដាល់របស់ខ្មែរយើងមានឱកាសចេញទៅបង្ហាញទេពកោសល្យរបស់ពួកគេនៅក្រៅប្រទេស លើសង្វៀនអន្តរជាតិធំៗដូចជា ONE Championship និង World Lethwei Championship (WLC) ជាដើម។
ពួកគេមិនត្រឹមតែទទួលបានតម្លៃខ្លួនខ្ពស់ជាងនៅកម្ពុជាប៉ុណ្ណោះទេ ប៉ុន្តែសង្វៀនក្បាច់គុនក៏ជាទីដ៏អស្ចារ្យមួយដើម្បីចែករំលែកសាបព្រោះវប្បធម៌ដ៏សម្បូរបែបនិងស្មារតីមុតមាំរបស់ខ្មែរទៅកាន់ពិភពលោកផងដែរ។
ជាអកុសល, លទ្ធផលមិនជាទីគាប់ចិត្តឡើយ។ ក្នុងចំណោមការប្រកួត១១ដងនៅ ONE និង WLC អំឡុងឆ្នាំ២០១៩នេះ អ្នកប្រដាល់កម្ពុជាបានចាញ់ដល់ទៅ៨០% ហើយឈ្នះតែ២លើកប៉ុណ្ណោះក្នុងឆ្នាំនេះ គឺ នៅ ស្រីពៅ នៅបាងកក និង ចាន់ រតនា នៅហ្សាកាតា ដែលអ្នកទាំងពីរប្រកួត MMA ដូចគ្នា។
វាធ្វើឱ្យអ្នកមានចម្ងល់ថា តើអ្វីជាមូលហេតុដែលកម្ពុជាមិនរកបានជោគជ័យដូចប្រទេសដទៃដូចជាថៃជាដើម នៅលើឆាកអន្តរជាតិ? (ថៃឈ្នះ២៦ដងក្នុងចំណោម៣៤ប្រកួតនៅ ONE Championship ស្មើនឹង៧៦%)។
ខណៈកំពុងបំពេញការងារជានាយកគ្រប់គ្រងទូទៅនៅសង្វៀនគុនខ្មែរឯកភ្នំក្នុងខេត្តបាត់ដំបង ខ្ញុំបានសួរអ្នកប្រដាល់ជាច្រើននាក់និងគ្រូបង្វឹកជាច្រើនរូបថាហេតុអ្វីបានជាពួកគេគិតថាគុនខ្មែរមិនទទួលបានជោគជ័យ? ពួកគេបានផ្ដល់ចម្លើយដូចៗគ្នាមួយគឺ «លុយ»។
កង្វះការគាំទ្រផ្នែកហិរញ្ញវត្ថុមានន័យថាអ្នកប្រដាល់មានជីវភាពលំបាក ហើយត្រូវដកឃ្លាពីការហ្វឹកហាត់ខ្លះៗដើម្បីស្វែងរកចំណូលបន្ថែម។ កង្វះថវិកា (និងចំណេះដឹង) ក៏បណ្ដាលឱ្យក្លិបប្រដាល់ និងអ្នកប្រកួតប្រជែងរបស់ពួកគេ មិនផ្ដល់សារៈសំខាន់គ្រប់គ្រាន់ដល់អាហារូបត្ថម្ភត្រឹមត្រូវនិងការហ្វឹកហាត់ជាមួយគ្រូបង្ហាត់លំដាប់កំពូលៗ។
ខ្ញុំមិនគិតថាលុយជាឫសគល់នៃគ្រប់បញ្ហាទាំងអស់ក្នុងប្រទេសកម្ពុជាឡើយ ទោះបីជាវាសំខាន់ក្នុងការធ្វើឱ្យគុនខ្មែរនិងគុនចម្រុះនៅទីនេះរីកចម្រើនក៏ដោយ។
កត្តាស្នូលមួយគឺថាកម្ពុជាគ្មានសង្វៀនធំក្នុងស្រុកណាមួយដែលជាការត្រៀមលក្ខណៈសម្រាប់កីឡាករខ្មែរដើម្បីចេញទៅប្រកួតនៅក្រៅប្រទេសនោះទេ។
តួយ៉ាង អ្នកប្រដាល់ក្មេងៗដូចជា គង់ សំបូរ, នៅ ស្រីពៅ និង ឡៅ ចិត្រា ចូលរួមប្រកួតលក្ខណៈអន្តរជាតិនៅក្រៅប្រទេសដោយគ្មានបទពិសោធប្រកួតក្រោមច្បាប់របស់ ONE Championship ឬ WLC សោះ។
គុនខ្មែរ ដែលជាការប្រកួតក្បាច់គុនប្រពៃណីរបស់ខ្មែរ មានរយៈពេល៥ទឹក មួយទឹកមាន៣នាទី ដោយសម្រាករយៈពេល១នាទីកន្លះ ឬ២នាទីនៅចន្លោះទឹកនីមួយៗ ហើយហ្គង់ជាទូទៅមានទំហំ៨អោនស៍ឬ១០អោនស៍។ ការប្រកួតច្រើនតែចាប់ផ្ដើមជាមួយចង្វាក់យឺតៗក្នុងទឹកទី១ រួចទើបបង្កើនល្បឿនញាប់ៗនៅកណ្ដាលទីដើម្បីទម្លាក់ដៃវិញនៅទឹកចុងក្រោយ។
ដោយសារអ្នកប្រដាល់គុនខ្មែរមានជំនាញល្អ ខ្ញុំគិតថា ONE Championship Super Series និង WLC ជាទីដែលកម្ពុជានឹងទទួលបានជោគជ័យភ្លាមៗ ប៉ុន្តែដើម្បីធ្វើបែបនោះបាន គុនខ្មែរ ត្រូវតែវិវឌ្ឍខ្លួនទៅមុខ ដោយមិនត្រូវទុកចោលក្រោយគេឡើយ។
តាមរយៈជំនួយហិរញ្ញវត្ថុពីក្រុមហ៊ុនមួយចំនួនរបស់កម្ពុជា ដែលយល់ពីសារៈសំខាន់នៃការជួយគុនខ្មែរឱ្យរីកចម្រើន ពួកយើងចង់បង្កើតលីគគុនខ្មែរថ្មីមួយឈ្មោះថា Kun Khmer ULTRA។
- ប្រើហ្គង់ MMA (ទំហំ៤អោនស៍)
- វាយ៣ទឹក មួយទឹក៣នាទី
- សម្រាក១នាទីនៅចន្លោះទឹកនីមួយៗ
- អាជ្ញាកណ្ដាលដែលតឿនឱ្យកីឡាករសម្រុក
- ការឱ្យពិន្ទុត្រូវដាក់ចំពោះការប្រកួតទាំងមូល មិនមែនដាក់តាមទឹកមួយទឹកៗនោះទេ
សព្វថ្ងៃនេះ ជើងឯកគុនខ្មែរមិនមានលក្ខណៈរួចរាល់សម្រាប់ការប្រកួតអន្តរជាតិនៅក្រៅប្រទេសនោះទេ ប៉ុន្តែអនាគតជើងឯក Kun Khmer ULTRA នឹងមានបទពិសោធគ្រប់គ្រាន់និងថ្នឹកជាមួយការប្រកួតក្រោមច្បាប់សកល ហ្គង់ និងល្បឿននៃចង្វាក់ប្រកួត។
កំពូលតារាគុនខ្មែរដូចជា កែវ រំចង់ បានយល់ព្រមរួចហើយថានឹងចូលប្រកួតក្រោមច្បាប់ទាំងនេះ។ តារាជំនាន់ថ្មី ឈុត សិរីវ៉ាន់ថង ក៏ឯកភាពចំពោះច្បាប់នេះដែរ។
ប្រសិនពួកយើងចង់ផ្សព្វផ្សាយគុនខ្មែរ និងវប្បធម៌ដ៏ផូរផងសម្បូរបែបរបស់ខ្មែរទៅកាន់ពិភពលោក ពួកយើងត្រូវគិតខុសពីគេ បើមិនអីចឹងទេ ពួកយើងនឹងត្រូវបានគេទុកចោល ស្របពេលពិភពក្បាច់គុនកំពុងបន្តរីកចម្រើន។
ដោយសារតែច្បាប់ប្រកួតប្រកបដោយលក្ខណៈសកម្មនៃការវាយ ខ្ញុំគិតថា Kun Khmer ULTRA មានឱកាសទាក់ទាញចំណាប់អារម្មណ៍មិនត្រឹមតែពីសំណាក់អ្នកគាំទ្រកម្ពុជាប៉ុណ្ណោះទេ តែថែមទាំងទាក់ទាញការគាំទ្រពីអន្តរជាតិថែមទៀតផង។
ខណៈមានកំណើនទស្សនិកជនកាន់តែច្រើនឡើងចូលទស្សនា ពួកយើងអាចចាប់ផ្ដើមបង់លុយដល់អត្តពលិករបស់យើងសម្រាប់អ្វីដែលពួកគេស័ក្ដិសមនឹងទទួលបាន ហើយធ្វើឱ្យពួកគេមានលក្ខណៈរួចរាល់ដើម្បីតំណាងព្រះរាជាណាចក្រអច្ឆរិយៈយ៉ាងពិតប្រាកដ។
ប្រសិនអ្នកគាំទ្រគំនិតនេះ សូមចែករំលែកនិងជួយពួកយើងក្នុងការទាក់ទងទៅកាន់ក្រុមហ៊ុននានាដែលចង់ក្លាយជាចំណែកនៃជំពូកថ្មីនៃគុនខ្មែររបស់យើង។
ប្រសិនបើអ្នកមិនយល់ស្របទេ ខ្ញុំចង់ស្ដាប់គំនិតនិងមតិយោបល់របស់អ្នកអំពី Kun Khmer ULTRA នៅក្នុងប្រអប់បញ្ចេញមតិខាងក្រោម!
/ Matias Andres, General Manager of Ek Phnom Kun Khmer Arena
Khmer Komlang 
I’m support this idea to create it 100@%
LikeLike
ខ្ញុំគាំទ្រជានិច្ច
LikeLike