កីឡាការិនីគុនខ្មែរដ៏លេចធ្លោ នៅ ស្រីពៅ បានរំលឹករឿងរ៉ាវទាំងឡាយដែលបានកើតឡើងនៅឆ្នាំ ២០១៩ និង ដាក់គោលដៅសម្រាប់ឆ្នាំ ២០២០ ដែលជិតឈានចូលមកដល់នាពេលខាងមុខនេះ។ ២០១៩ ជាឆ្នាំដ៏ចងចាំមិនអាចបំភ្លេចបាន ប៉ុន្តែ ឆ្នាំ ២០២០ គឺជាឆ្នាំដែលទន្ទឹងរង់ចាំជោគជ័យថ្មីសម្រាប់ នៅ ស្រីពៅ ក្នុងពិភពអ្នកលេងក្បាច់គុន។
ស្រី ពៅរំលឹក ឆ្នាំ ២០១៩
បន្ទាប់ពីទទួលបានជ័យជម្នះពីរលើកជាប់គ្នានៅឆ្នាំ ២០១៨ នៅសង្វៀនអន្តរជាតិស្ថិតនៅប្រទេសមីយ៉ាន់ម៉ា កីឡាការិនី នៅ ស្រីពៅ បង្កើតបានរឿងរ៉ាវគួរភ្ញាក់ផ្អើលមួយនៅសង្វៀនលំដាប់ពិភពលោក ONE Championship។ កីឡាការិនីដែលឡើងសង្វៀនបាន ១០០ ដង រូបនេះបានយកឈ្នះកីឡាការិនីថៃ Rika Ishige ដោយពិន្ទុ កាលខែ កុម្ភៈ ឆ្នាំ ២០១៩ ក្នុងកម្មវិធី ONE: CLASH OF LEGENDS ពេលរៀបចំនៅប្រទេសថៃ។ ស្រីពៅ ក្រសោបបានប្រជាប្រិយភាពក្នុងស្រទាប់មហាជន និង អ្នកគាំទ្រប្រដាល់នៅកម្ពុជាជាច្រើនពាន់នាក់។
ស្រីពៅ បានរំលឹកថា ៖«ខ្ញុំសប្បាយចិត្តពេលនោះព្រោះខ្ញុំទើបឡើងសង្វៀន ONE បានម្ដង ខណៈដែល Riga មានបទពិសោធន៍រហូតដល់ ៨ ដងលើសង្វៀននេះ។ ខ្ញុំមិនសូវរំពឹងឈ្នះទាល់តែសោះ។ ប៉ុន្តែ ខ្ញុំធ្វើបានល្អ។ ខ្ញុំចងចាំមិនភ្លេច»។
រឿងរ៉ាវ ស្រដៀងគ្នានេះ នៅ ស្រីពៅ ក៏មិនភ្លេចក្នុងការប្រកួតលើកទី២នៅសង្វៀន ONE ពេលចាញ់កីឡាការិនីជើងចាស់ Priscilla Hertati Lumban Gaol ដែលជារីរនារីកីឡាការិនី របស់ឥណ្ឌូណេស៊ី ដោយពិន្ទុកាលខែ ឧសភា ឆ្នាំដដែលនេះ។ យ៉ាងណាក្ដី ការចាញ់ពិន្ទុនេះ ត្រូវបាន ស្រីពៅ លើកសរសើរថា Priscilla ជាកីឡាការិនីជំនាញឃ្លេនេះយូរមកហើយ ខណៈដែលរូបគេទើបរៀនក្បាច់ឃ្លេតែប៉ុណ្ណោះ។ ភាពបរាជ័យនេះធ្វើឲ្យ កីឡាការិនីវ័យ២៤ ឆ្នាំដាក់គោលដៅហ្វឹកហាត់បន្ថែមបើសិនមានការប្រកួតគុនចម្រុះលើកក្រោយ។
https://www.onefc.com/videos/nou-srey-pov-vs-priscilla-hertati-lumban-gaol/
រឿងចងចាំមួយទៀតឆ្នាំ ២០១៩៖
«ខ្ញុំមិនអាចបំភ្លេចបានមួយទៀតព្រោះវាជាមេដាយសំរឹទ្ធដំបូងសម្រាប់ខ្ញុំនៅស៊ីហ្គេម និង ជាការប្រកួតលើកដំបូងដែរនៅស៊ីហ្គេមឆ្នាំ ២០១៩ នេះ។ ប៉ុន្តែវារឿងសោកស្ដាយពេលចាញ់កីឡាការិនីវៀតណាមមិនបានទៅវគ្គផ្ដាច់ព្រ័ត្រដោយសារមានបញ្ហារបួសជើង។ ខ្ញុំពិតស្ដាយខ្លាំងណាស់ ខ្ញុំខំហាត់នៅជប៉ុនរយៈពេលប្រមាណ ៣ ខែ បែរមកជួបបញ្ហាបែបនេះទៅវិញ។ យ៉ាងណាក្ដី ខ្ញុំសប្បាយចិត្តសម្រាប់មេដាយដំបូងនេះហើយត្រូវត្រៀមខ្លួនឲ្យល្អថែមទៀតនាប្រកួតលើកក្រោយទៀត»។
គោលដៅឆ្នាំ ២០២០៖
កូនសិស្សមកពីក្លិបប្រដាល់តាឡីដំរីមានរិទ្ធិបានដាក់គោលដៅស្វែងរកការប្រកួតឲ្យបានច្រើនបើសិនមិនមានបញ្ហារបួសទេ។
ស្រីពៅ ថ្លែងថា៖«គោលដៅឆ្នាំថ្មី គឺ ចង់បានការប្រកួតឲ្យច្រើនជាងមុន មិនថា សកល ប្រដាល់សេរី ឬ គុនចម្រុះទេដើម្បីបានបទពិសោធន៍ និង ពង្រឹងក្បាច់គុន។ ខ្ញុំនឹងប្រឹងប្រែងជាងឆ្នាំចាស់។ ខ្ញុំចូលហ្វឹកហាត់នៅក្លិបរបស់ខ្ញុំ តាឡីដំរីមានរិទ្ធិ វិញនៅខែ មករា ឆ្នាំ ២០២០ ខាងមុខ បន្ទាប់ពីប្រកួតស៊ីហ្គេមទើបបញ្ចប់ថ្មីៗ»។
កូនសិស្សរបស់លោក ញ៉ូវ ម៉ាក ម៉ាក សាខន បានសង្កត់ធ្ងន់ថា៖«បើខ្ញុំមានឱកាសទៅប្រកួតនៅសង្វៀន ONE Championship ជាថ្មី ខ្ញុំនឹងទៅដោយសប្បាយចិត្តនៅឆ្នាំ ២០២០។ ព្រោះយើងអាចបង្កើនសមត្ថភាពលើសង្វៀនដែលសម្បូរដោយកីឡាករកីឡាការិនីមានទេពកោសល្យមួយនេះ»។
គួររំលឹកថា នៅ ស្រីពៅ មានកំណត់ត្រាប្រកួតបានចំនួន ១០០ ដងក្នុងការប្រកួតលើសង្វៀនប្រដាល់គុនខ្មែរ សកល និង គុនចម្រុះ។ ប៉ុន្តែបើនិយាយអំពីការចេញទៅប្រកួតជាលក្ខណៈអន្តរជាតិមិនមែនស៊ីហ្គេម រូបគេប្រកួតបានចំនួន ៤ដង ក្នុងនោះឈ្នះ ៣ ដង និងចាញ់ ១ ដង។ នៅ ស្រីពៅ ជាកីឡាការិនី មានទេពកោសល្យម្នាក់ក្នុងទម្ងន់ ៥៣ គីឡូក្រាម ហើយអាចប្រកួតបានទាំងប្រដាល់គុនខ្មែរ វ៉ៃសកល និង វ៉ៃគុនចម្រុះ។
កុំភ្លេចទស្សនា កម្មវិធីបន្ទាប់របស់ស្ថាប័ន ONE Championship សូមទស្សនា ONE: A NEW TOMORROW នៅថ្ងៃទី ១០ ខែ មករា ចាប់ពីវេលាម៉ោង ៧ ល្ងាចតទៅដែលមានផ្សាយផ្ទាល់តាមរយៈ Facebook, Twitter, YouTube,និង ONE Super App។ ។ អត្ថបទ៖ ស៊ីធី
Khmer Komlang 