២០១៩ជាឆ្នាំល្អបំផុតសម្រាប់ជើងខ្លាំងក្បាច់គុនមួយថៃ និង kickboxing។ ជាមួយគ្នានោះ កីឡាករថ្មីៗជាច្រើនបានលេចឡើងផងដែរ។ ចំណែកជើងខ្លាំងវ័យក្មេង និង វីរបុរសមួយចំនួនក៏ស្ថិតនៅលំដាប់កំពូលនៃ សង្វៀន ONE Championship ក្នុងការប្រកួត ONE Super Series ទៀតផង។ រយៈពេល ១២ ខែ មក នេះ មានកីឡាកររាប់រយនាក់បញ្ចេញស្នាដៃគួរឲ្យកត់សម្គាល់។ យ៉ាងណាក្ដី ពេលនេះសូមបង្ហាញកីឡាករល្បីឈ្មោះ និង ធ្វើបានល្អចំនួន ៥ នាក់ក្នុងកម្មវិធី ONE Super Series Warriors ឆ្នាំ ២០១៩ ហើយ ពួកគេសុទ្ធតែកាន់ខ្សែក្រវាត់លំដាប់ពិភពលោករៀងៗខ្លួន។
#1 Rodtang Jitmuangnon
Rodtang Jitmuangnon ឬ «The Iron Man» ទទួលបានលទ្ធផលល្អ និង ជាឆ្នាំមាសនៅឆ្នាំ ២០១៩ នាសង្វៀនកម្រិតពិភពលោក ONE។ តារាថៃរូបនេះ ឈ្នះ ៥ លើកជាប់គ្នានៅសង្វៀន ONE Super Series ពេលចាប់ផ្ដើមប្រកួតតាំងពីខែ មករា មក។ បន្ទាប់មកទៀត Rodtang ការពារខ្សែក្រវាត់ ONE Flyweight Muay Thai World Championship បានសម្រេច។ កីឡាករវ័យ ២២ ឆ្នាំរូបនេះ ឈ្នះពិន្ទុកីឡាករ Fahdi Khaled នៅកម្មវិធី ONE: HERO’S ASCENT កាលខែ មករា និង បន្តឈ្នះ Hakim Hamech នៅសង្វៀន ONE: A NEW ERA កាលខែ មីនា។ កីឡាករមកពីបាងកករូបនេះ យកឈ្នះកីឡាករកម្ពុជា សុខ ធី នៅក្នុងកម្មវិធី ONE: WARRIORS OF LIGHT កាលខែកុម្ភៈ មុនពេលឈ្នះខ្សែក្រវាត់ ONE Flyweight Muay Thai World Championship ក្រោយពីឈ្នះពិន្ទុ Jonathan Haggerty នៅក្នុងកម្មវិធី ONE: DAWN OF HEROES កាលខែសីហា។ ក្នុងការប្រកួតចុងក្រោយនាឆ្នាំនេះ កីឡាកររហស្សនាមមនុស្សដែកបានបិទបញ្ចប់ឆ្នាំ ២០១៩ ដោយការពារខ្សែក្រវាត់បានជោគជ័យទល់នឹងជើងខ្លាំងមកពីប្រេស៊ីល Walter Goncalves នៅក្នុងកម្មវិធីធំគម្រប់ការរៀបចំព្រឹត្តិការណ៍១០០លើក ONE: CENTURY PART។
អ្នកគាំទ្រនៅប្រទេសថៃរឹតតែសប្បាយចិត្ត ព្រោះរូបគេបើកទំព័រថ្មីនៅឆ្នាំ២០២០ ដោយឡើងមកការពារខ្សែក្រវាត់ក្នុងជំនួបសងសឹកតតាំងនឹង Haggerty ក្នុងកម្មវិធី ONE: A NEW TOMORROW ដែលប្រព្រឹត្តទៅនៅថ្ងៃសុក្រទី ១០ ខែ មករា ខាងមុខ។
#2 Giorgio Petrosyan
មានវីរបុរសតិចណាស់ពីការប្រកួត kickboxing ប៉ុន្តែ Giorgio Petrosyan ឬ “The Doctor” ជាកីឡាករល្អម្នាក់ក្នុងចំណោមនោះ។ ជើងខ្លាំងកូនកាត់អាមេនី-អ៊ីតាលី មមាញឹកក្នុងការប្រកួតតាំងពីឆ្នាំ ២០១២ មកម៉្លេះ។ រូបគេមិនចាញ់ទាល់តែសោះក្នុងការប្រកួត ៤ លើកនៅសង្វៀន ONE និងបន្តដំណើរឈានទៅរកភាពជោគជ័យផ្នែក kickboxing ដ៏មានប្រសិទ្ធភាព។ Petrosyan មានឈ្មោះប្រកួតដណ្ដើមខ្សែក្រវាត់ ONE Featherweight Kickboxing World Grand Prix។ «The Doctor» ប៉ះ Petchmorakot Petchyindee Academy នៅក្នុងកម្មវិធី ONE: ENTER THE DRAGON កាលខែឧសភា ប៉ុន្តែលទ្ធផលនៅមិនច្បាស់លាស់ទេដោយសារមានការតវ៉ា។ យ៉ាងណាក្ដី កូនកាត់អាមេនី-អ៊ីតាលី យកឈ្នះ Petchmorakot នៅកម្មវិធី ONE: MASTERS OF DESTINY កាលខែកក្កដាដើម្បីឲ្យអស់មន្ទិលសង្ស័យ។ បន្ទាប់មកទៀត “The Doctor” ម៉ាត់ផ្ដួល “Smokin” Jo Nattawut ឲ្យសន្លប់ត្រឹមទឹកទី១ នាវគ្គពាក់កណ្ដាលផ្ដាច់ព្រ័ត្រនៅកម្មវិធី ONE: DREAMS OF GOLD កាលខែសីហា មុនពេលឈ្នះពិន្ទុ Samy Sana ឬ “AK47” ក្នុងវគ្គផ្ដាច់ព្រ័ត្រ ហើយក៏ឈ្នះខ្សែក្រវាត់ ONE Featherweight Kickboxing World Grand Prix Championship តែម្ដង។ ខ្សែក្រវាត់នេះមានប្រាក់រង្វាន់ ១ លានដុល្លារអាមេរិកដែលរៀបចំប្រកួតក្នុងកម្មវិធី ONE: CENTURY PART។ ស្ថិតក្នុងវ័យ ៣៤ ឆ្នាំ Petrosyan នៅតែខ្លាំងក្លាមិនថមថយនោះទេ។ ជាក់ស្ដែង រូបគេមានភាពរីកចម្រើនជាហូរហែតាមរយៈការប្រកួតកន្លងមក។
#3 Nong-O Gaiyanghadao
Nong-O Gaiyanghadao នៅតែអស្ចារ្យក្នុងកម្មវិធី ONE Super Series នៅឆ្នាំ ២០១៩។ Nong-O Gaiyanghadao ឈ្នះ៤លើកជាប់គ្នា និង ឈ្នះខ្សែក្រវាត់ ONE Bantamweight Muay Thai World Title ហើយក៏ការពារខ្សែក្រវាត់បានជោគជ័យចំនួន ៣ លើកផងដែរ។ កាលខែកុម្ភៈ កូនសិស្សមកពីក្លិប Evolve បានយកឈ្នះ Han Zi Hao នៅសង្វៀន ONE: CLASH OF LEGENDS ដើម្បីគ្រងខ្សែក្រវាត់ ហើយបន្តឈ្នះ Hiroaki Suzuki ក្នុងកម្មវិធី ONE: WARRIORS OF LIGHT ពេលឡើងការពារខ្សែក្រវាត់លើកដំបូងកាលខែ ឧសភា។
ជាបន្តបន្ទាប់ វីរបុរសរបស់ថៃរូបនេះ ឈ្នះ Brice Delval កាលខែ កញ្ញានៅកម្មវិធី ONE: IMMORTAL TRIUMPH ពេលរៀបចំនៅវៀតណាមលើកដំបូង ហើយក៏ជាការការពារខ្សែក្រវាត់លើកទី២ មុនពេលផ្ដួលមិត្តរួមជាតិ Saemapetch Fairtex ឲ្យសន្លប់នៅកម្មវិធីONE: EDGE OF GREATNESS កាលខែ វិច្ឆិកា។
ឥឡូវនេះ Nong-O ក្លាយជាម្ចាស់ខ្សែក្រវាត់ ONE Super Series ដែលគ្រប់គ្រងបានយូរជាងគេនៅក្នុងប្រវត្តិសាស្ត្ររបស់ ONE។ Nong-O មិនទាន់ស្គាល់ពាក្យថាចាញ់សោះតាំងពីបង្ហាញខ្លួនលើកដំបូងនៅសង្វៀនលំដាប់ពិភពលោកតាំងពីពីរឆ្នាំមុន។
#4 Regian Eersel
Regian Eersel ឬ «The Immortal» ឈ្នះការប្រកួតក្នុងកម្មវិធី ONE Super Series មិនធ្លាប់មានកាលខែ មេសា ឆ្នាំ ២០១៨ ហើយគេប្រកាសខ្លួនថាជាកីឡាករលំដាប់ពិភពលោកម្នាក់ក្នុងឆ្នាំ ២០១៩ កន្លងទៅនេះ។ កីឡាករហូឡង់រូបនេះផ្ដួលAnthony Njokuani នៅក្នុងកម្មវិធី ONE: CALL TO GREATNESS កាលខែ កុម្ភៈ។ Eersel ឈ្នះខ្សែក្រវាត់ ONE Lightweight Kickboxing World Championship ដែលទើបបើកឲ្យដំណើរការប្រកួតលើកដំបូង។
Regian Eersel គ្រប់គ្រងការប្រកួតបានយ៉ាងល្អទល់នឹង Nieky Holzken ដើម្បីឈ្នះពិន្ទុនៅក្នុងកម្មវិធី ONE: ENTER THE DRAGON កាលខែឧសភា។ គេពិតជាសក្ដិសមជាម្ចាស់ខ្សែទម្ងន់ lightweight ដោយអាចការពារខ្សែក្រវាត់ និង ឈ្នះពិន្ទុលើ Holzken ដដែលក្នុងជំនួបសងសឹកនៅ ONE: DAWN OF VALOR កាលខែតុលា។
#5 Stamp Fairtex
Stamp Fairtex បង្កើតបានកំណត់ត្រាជាច្រើនជាពិសេសនៅឆ្នាំ ២០១៩។ កីឡាការិនីជើងខ្លាំងវ័យ ២២ ឆ្នាំរូបនេះបានទទួលជ័យជម្នះ និង ការពារខ្សែក្រវាត់បានយ៉ាងជោគជ័យផងដែរ ដូចជាការពារខ្សែក្រវាត់ទី២ ONE Super Series World Championship ជាដើម។ កាលខែកុម្ភៈ Stamp យកឈ្នះ Janet Todd ដោយពិន្ទុជាឯកច្ឆន្ទដើម្បីគ្រងខ្សែក្រវាត់ ONE Atomweight Muay Thai World Title នៅក្នុងកម្មវិធី ONE: CALL TO GREATNESS។ Stamp បានក្លាយជាកីឡាការិនីដំបូងឈ្នះខ្សែក្រវាត់ពីរស្ថាប័ននៅក្នុងប្រវត្តិសាស្ត្ររបស់ ONE។ ក្រោយមកទៀត Stamp ការពារខ្សែក្រវាត់បានសម្រេចដដែលទល់នឹង Alma Juniku នៅក្នុងកម្មវិធី ONE: LEGENDARY QUEST កាលខែមិថុនា។
ក្រៅពីនោះ Stamp បន្តឈ្នះពីរលើកក្នុងការប្រកួតកីឡាគុនចម្រុះវិញម្ដង។ កីឡាការិនីរូបនេះចង់ឈ្នះខ្សែក្រវាត់ពិភពលោក ONE World Title ទី៣ក្នុងកម្មវិធីគុនចម្រុះ។ ចាប់ផ្ដើមខែ មករា Stamp ជួប Puja Tomar នៅក្នុងកម្មវិធី ONE: A NEW TOMORROW នាថ្ងៃទី ១០ ខែ មករា ខាងមុខ មុនពេលបេសកកម្មការពារខ្សែក្រវាត់របស់ខ្លួន។
កុំភ្លេចទស្សនា កម្មវិធីបន្ទាប់របស់ស្ថាប័ន ONE Championship សូមទស្សនា ONE: A NEW TOMORROW នៅថ្ងៃទី ១០ ខែ មករា ចាប់ពីវេលាម៉ោង ៧ ល្ងាចតទៅដែលមានផ្សាយផ្ទាល់តាមរយៈ Facebook, Twitter, YouTube,និង ONE Super App៕
អត្ថបទ: ស៊ីធី
Khmer Komlang 