កីឡាករគុនចម្រុះ និង គុនខ្មែរ ចាន់ សំអាត ចាប់ផ្ដើមមានឈ្មោះបោះសំឡេងរហូតដល់បច្ចុប្បន្ន បន្ទាប់ពីរូបគេចូលប្រឡូកក្នុងវិស័យក្បាច់គុនតាំងពីឆ្នាំ ២០០៨ មក។ ជាមួយគ្នានេះ គេមានចំណុចសំខាន់ចំនួន ៣ ដែលអ្នកគាំទ្រអាចមិនដឹងអំពី អ្នកលេងគុនចម្រុះរូបនេះដូចជាជីវិតគ្រួសារ ការចូលហាត់ប្រដាល់ដំបូង និង ការប្រឡូកក្នុងវិស័យគុនចម្រុះ។
១-ជីវិតគ្រួសារ៖
ចាន់ សំអាត មានស្រុកកំណើតនៅភូមិទួលក្រឡាញ់ ឃុំថ្លាត ស្រុកអន្លង់វែង ខេត្តឧត្ដរមានជ័យ។ ចាន់ សំអាត រៀបការតាំងពីឆ្នាំ ២០១២ ជាមួយប្រពន្ធឈ្មោះ ប្រពន្ធ សាន្ត ឆេងហួង នៅស្រុកអន្លង់វែងខេត្តបន្ទាយមានជ័យ។ ភរិយា របស់ សំអាត បម្រើការងារនៅអង្គការមួយនៅឯស្រុកកំណើត។ សំអាត និង ភរិយា ជាអ្នករស់នៅក្នុងភូមិក្បែរគ្នា។ មុនចូលរោងជ័យអ្នកទាំងពីរបានមើលចិត្តគ្នាអស់រយៈពេលប្រមាណ២ ឆ្នាំ។ ក្ដីស្រលាញ់មួយនេះមិនមានការណែនាំពីសាច់ញាតិ ឬ ការបង្ខំទេ ប៉ុន្តែវាជាការក្ដីស្រលាញ់ពិតប្រាកដរវាងសាមីខ្លួនទាំងសងខាង។ អ្នកទាំងពីរបង្កើតបានចំណងដៃបានកូនប្រុសអាយុ ៥ ឆ្នាំ និង កូនស្រី អាយុ ២ឆ្នាំ។ ដ្បិតរៀបការតាំងពី ៧ ឆ្នាំមុន ប៉ុន្តែ សំអាត នៅតែអាចគ្រប់គ្រងខ្លួនឯង និង នៅប្រកបអាជីពជាកីឡាករប្រដាល់លេចធ្លោម្នាក់នៅកម្ពុជា។
២-ដូរឈ្មោះត្រកូលរៀមច្បង ខុន ស៊ីចាន់ ពេលប្រឡូកលើសង្វៀនប្រដាល់
វាអាចជារឿងចៃដន្យមួយឬ ខ្សែជីវិតតម្រូវឲ្យបែបនេះក៏ថាបាន។ ចាន់ សំអាត មិនដែលនឹកឃើញរឿងឡើងប្រដាល់អាជីពនៅលើសង្វៀនឡើយ ប៉ុន្តែរូបគេធ្លាប់ហាត់លេង និង ទាត់បាវសាក់នៅក្នុងភូមិកាលនៅតូចៗជាមួយក្មេងៗដូចគ្នាក្នុងភូមិ។ សំអាត ជាអ្នករៀនសូត្រម្នាក់ក្នុងចំណោមក្មេងៗទាំង ឡាយពេលមានជំហររឹងមាំពីឳពុកទំនុកបម្រុង។ ពេលឳពុករបស់ខ្លួនលាចាក ចោលម្ដាយនិងបងប្អូនប្រុសស្រី៣ នាក់នៅឆ្នាំ ២០០២ ធ្វើឲ្យ សំអាត ប្រែចិត្តទៅជាក្មេងម្នាក់ដើរលេងច្រើន ឬ ហៅថាក្មេងស្ទាវមិនចូលសាលា និង ឈប់រៀនត្រឹមថ្នាក់ទី ៧ ប៉ុណ្ណោះ ដោយសារការបាក់ទឹកចិត្ត។ ប៉ុន្តែ គ្រាមួយនោះក្នុងពិធីបុណ្យចូលឆ្នាំខ្មែរ នាឆ្នាំ ២០០៨ គេប្រកាសរកអ្នកប្រកួត នៅលើរេញជាប់ដៃ ក្នុងវត្ត «ថ្លាត» ដែលជាកម្មវិធីសប្បាយៗ សំអាត ក៏ឡើងប្រកួត ហើយទទួលជ័យជម្នះ។ ពេលនោះអ្នកប្រដាល់ជើងចាស់ ខុន ស៊ីចាន់ ក៏មានវត្តមាននៅទីនោះ ហើយនិយាយទៅកាន់ សំអាត ថា ៖« សំអាត វ៉ៃស៊ូគ្រាន់បើ ទោះអត់ទាន់ចេះក្បាច់ …បើសិនបានហ្វឹកហាត់ទៀត ល្អ»។ មិនយូរប៉ុន្មាន ខុន ស៊ីចាន់ បានណែនាំ សំអាត ទៅហាត់ជាមួយលោក គ្រូ ឡោ វុទ្ធី នៅក្លិប កងពលធំអន្តរាគមន៍លេខ៣ខេត្តព្រះវិហារ។ ពេលចូលហ្វឹកហាត់ជាមួយគ្រូបង្វឹក ឡោ វុទ្ធី និង បង្ហាញអំពីការដឹងគុណដល់ ខុន ស៊ីចាន់ ផងនោះ ក៏សំអាត បានប្រើឈ្មោះ ចាន់ សំអាត តាំងពីឆ្នាំ ២០០៨ នោះមក។ តាមពិតឈ្មោះដើមរបស់ខ្លួន គឺ «ធាន អាត»។ ចាប់ពីពេលនេះមក ទៅណាមកណា ប្រកួតនៅខេត្ត ឬ ភ្នំពេញ ខុន ស៊ីចាន់ តែងតែយក សំអាត ទៅជាមួយជានិច្ច។ ដោយសារ សំអាត រឹងដៃជើង និង ដូរក្លិបហ្វឹកហាត់ទើបបែកគ្នាជាមួយ ខុន ស៊ីចាន់ ប៉ុន្តែទំនាក់ទំនងនៅល្អដដែលរវាងបងប្អូនទាំងពីរនេះ។ កីឡាករគុនចម្រុះវ័យ ២៦ ឆ្នាំរូបនេះរំលឹកថា ខុន ស៊ីចាន់ ជាមនុស្សដំបូងណែនាំខ្លួនឲ្យក្លាយជាកីឡាករប្រដាល់រហូតដល់គុនចម្រុះបច្ចុប្បន្ន។
៣-ការចូលប្រកួតក្នុងនាមកីឡាករជំនួសរហូតដល់ឈ្នះខ្សែក្រវាត់ Khmer Warrior Challenge
នៅឆ្នាំ ២០១៣ ចាន់ សំអាត ចាប់ផ្ដើមហ្វឹកហាត់ក្បាច់គុនចម្រុះ ដើម្បីប្រកួតក្នុងកម្មវិធី Khmer Warrior Challenge ដែលរៀបឡើងដោយស្ថានីយទូរទស្សន៍ ស៊ីធីអិន និង MyTV ដោយការផ្ដួចផ្ដើមរបស់សពលោក ម៉ា សេរី អតីតប្រធានផ្នែកកីឡា CBS។ កម្មវិធីនេះតម្រូវឲ្យស្នាក់នៅ ហូបចុកជុំគ្នា និង ហាត់ជុំគ្នាដោយហ្វឹកហាត់ជាមួយគ្រូជាច្រើន មានប្រដាល់សេរី យូដូ ចំបាប់ និង គុនចម្រុះជាដើម។ ចាន់ សំអាត ជាកីឡាករម្នាក់ដែលត្រូវហៅឲ្យចូលជំនួសគេ បន្ទាប់ពី មានកីឡាករម្នាក់រត់ចោលជួរក្នុងការប្រមូលផ្ដុំ។ ទីបំផុតក្នុនាមកីឡាករមិនមានឈ្មោះក្នុងបញ្ជីដើមរបស់កម្មវិធី កីឡាករមកពីខេត្តឧត្ដរមានជ័យរូបនេះក្លាយជាម្ចាស់ខ្សែក្រវាត់ Khmer Warrior Challenge វគ្គ៣នៅឆ្នាំ ២០១៤។ នៅ ឆ្នាំ ២០១៤ ដដែលគេបានស្គាល់គ្រូហ៊ុន ច័នរាជ្យ និង បន្តហ្វឹកហាត់នៅក្លិប Cambodian Top Team ដល់សព្វថ្ងៃ។ កីឡាករដែលមានឈ្មោះ ដើម ធាន អាត ទទួលបានការអញ្ជើញទៅប្រកួតនៅសង្វៀនលំដាប់ពិភពលោក ONE Championship ជារឿយៗ ។ នាដើមខែសីហាខាងមុខនេះ បុរសកូនពីរនឹងបង្ហាញខ្លួនក្នុងការប្រកួតនៅសង្វៀន ONE ជាថ្មីនាប្រទេសសិង្ហបុរី៕
អត្ថបទ៖ ស៊ីធី
Khmer Komlang 